ຖ້ຳກອງລໍ່ Kong Lor cave

ຖ້ຳກອງລໍ່, ເປັນອີກສະຖານທີ່ໜຶ່ງທີ່ໂດ່ງດັງ ແລະ ສ້າງຊື່ສຽງໃຫ້ແກ່ປະເທດລາວ, ເພາະເປັນຖ້ຳນ້ຳລອດທີ່ຍາວ 7 ກວ່າກິໂລແມັດ, ແລະ ມີປ່າປົກຫຸ້ມ ຂຽວງາມຕະຫຼອດປີ !

ຮູບປາກຖ້ຳ ມຸມໄກ້ໆ ທີ່ຫຼາຍຄົນຍັງບໍ່ທັນເຄີຍເຫັນ

ຖ້ຳກອງລໍ່ ຕັ້ງຢູ່ເມືອງຄູນຄຳ ແຂວງຄຳມ່ວນ, ຫ່າງຈາກນະຄອນຫຼວງວຽງຈັນປະມານ 300 ປາຍກິໂລ. ເມື່ອຂັບລົດຈາກນະຄອນຫຼວງວຽງຈັນໄປປະມານ 250 ກິໂລຈະຮອດທາງແບ່ງຫຼັກຊາວ, ຫຼັງຈາກນັ້ນ ລ້ຽວຊ້າຍໄປທາງຫຼັກຊາວເຂົ້າໄປ, ຢ່າລືມແວ່ຈຸດຊົມວິວຜາໜາມໜໍ່ເຊິ່ງເປັນວິວມຸມສູງ ແລະ ເປັນບ່ອນພັກລົດທີ່ຂື້ນພູມາຍາວນານ.

ຈຸດຊົມວິວ ຜາໜາມໜໍ່

ລົງຈາກຈຸດຊົມວິວໄປ ຈະເຈິ 3 ແຍກອີກ,​ ຈະມີປ້າຍບອກ,​ ໃຫ້ລ້ຽວຂວາແລ້ວຂັບໄປເລື້ອຍໆຜ່ານໝູ່ບ້ານ ແລະ ທົ່ງນາຂຽວ(ຖ້າໄປຖືກລະດູການເຮັດນາ)

ທົ່ງນາຂຽວ ອ້ອມຮອບດ້ວຍຜາຫີນ ທັງສອງຟາກທາງ

ສຸດທ້າຍກໍ່ມາຮອດ ຈະເປັນໝູ່ບ້ານນ້ອຍໆ ມີເຮືອນພັກ ລວມຮ້ານອາຫານແບບນ້ອຍໆ ແຕ່ອົບອຸ່ນ.

ບັນຍາກາດຕອນເຊົ້າທີ່ໝູ່ບ້ານກອງລໍ່

ຄຳເຫັນຈາກຜູ້ຂຽນ

ມັນບໍ່ແມ່ນສະຖານທີ່ພັກຜ່ອນແບບວັງວຽງ,​ແບບຫຼວງພຣະບາງ, ທີ່ມີຮ້ານບັນເທິງ ຮ້ານເຫຼົ້າຮ້ານເບຍ.. ສຳລັບຖ້ຳກອງລໍ່ແລ້ວ ມັນເປັນສະຖານທີ່ຂອງຄົນທີ່ມັກພັກຜ່ອນ, ເພາະກາງຄືນງຽບສະຫງັດ, ບໍ່ມີສຽງແຊວ, ບໍ່ມີສຽງເສບດັງ,​ ບໍ່ມີສຽງແຂ່ງລົດ, ບໍ່ມີວົງເຫູົ້າ, ບໍ່ມີຮ້ານບັນເທິງ...​ ມັນເປັນສະຫວັນຂອງຄົນທີ່ໜີຄວາມວຸ້ນວາຍ ແລະ ໄປພັກຜ່ອນຢ່າງແທ້ຈິງ.

ຫຼັງຈາກພັກຜ່ອນແລ້ວ ເຮົາກໍ່ເດີນທາງໄປຫາຖ້ຳ, ຂີ່ລົດໄປອີກປະມານ 1 ກິໂລແມັດ ກໍ່ຈະມີບ່ອນຈອດລົດ, ຄ່າຝາກລົດປະມານ 3000 ກີບ ແລະ ຈະເຈິປະຕູທາງເຂົ້າ

ປະຕູເຂົ້າໃນສະຖານທີ່ຖ້ຳ, ເສຍຄ່າເຂົ້າປະມານ 2000 ກີບສຳລັບຄົນລາວ

ສຳລັບຄ່າບໍລິການ ແລະ ກິດຈະກຳ

ຄ່າບໍລິການສຳລັບຄົນລາວເຂົ້າໄປ 2000 ກີບຕໍ່ຄົນ, ແລະ ຕ່າງປະເທດປະມານ 5000 ກີບ ບໍ່ລວມຄ່າຂີ່ເຮືອ. ຖ້າໃຜຢາກຂີ່ເຮືອແມ່ນລຳໜຶ່ງປະມານ 100,000-130,000 ກີບໃນການເໝົາລຳເຮືອ ເຊິ່ງຂີ່ໄດ້ປະມານ 3 ຄົນ ໃນນັ້ນຈະມີເສື້ອຊູຊີບ ແລະ ໂຄມໄຟໃສ່ຫົວໄວ້ແຍງທາງ.

ເຂົ້າມາບໍລິເວນຖ້ຳຈະມີປ່າໄມ້ປົກຫຸ້ມແບບນີ້

ເວລາຍ່າງຜ່ານປ່າ

ບາງຄັ້ງໄດ້ຍິນສຽງນົກ, ສຽງທະນີ, ສຽງບ່າງ... ຕອນເວລາເຮົາຍ່າງຜ່ານປ່າໄມ້ເຫຼົ່ານີ້, ມັນຂ້ອນຂ້າງຍັງອຸດົມສົມບູນຢູ່ ງຽບສະຫງັດ ຈົນບາງຄົນຮູ້ສຶກຢ້ານ

ຍ່າງມາສຸດກໍ່ຈະເຫັນສາຍນ້ຳ

ຈະມີເຮືອຈອດຖ້າຢູ່, ຖ້າມາຍາມແລ້ງຈະມີຂົວໄມ້ໃຜ່ຍ່າງຂ້າມນ້ຳ

ທາງຂື້້ນໄປເບິ່ງປາກຖ້ຳໄກ້ໆ ແຕ່ບໍ່ໄດ້ຂ້າມນ້ຳ

ນ້ຳໄຫຼທີ່ປາກຖ້ຳ

ຖ້າເຮົາມາໃນຍາມແລ້ງ, ເຮົາຈະເຫັນຂົວໄມ້ໃຜ່ຍ່າງຂ້າມນ້ຳເພື່ອໄປອີກຟາກ ແລະ ເຂົ້າໄປໃນປາກຖ້ຳໄປຂື້ນເຮືອຢູ່ໃນ, ຢູ່ບໍລິເວນຍ່າງຜ່ານນັ້ນ ຈະມີປາຢ່າງຫຼາຍໃຫ້ຊົມ ແລະ ສາມາດຊື້ອາຫານມາເກືອປາໄດ້

ຮູບຂົວຂ້າມນ້ຳທີ່ເຮັດດ້ວຍໄມ້ໃຜ່ໃນຍາມແລ້ງ

ມຸມຖ່າຍໄກ້ໆໜ້າປາກຖ້ຳ

ປາທີ່ຢູ່ໜ້າປາກຖ້ຳ, ຈະເຫັນສະເພາະຍາມແລ້ງ ແລະນ້ຳໄສ

ປາທີ່ອາໄສແຖວປາກຖ້ຳເປັນປາທີ່ອະນຸລັກ,​ ຖ້າຜູ້ໄດຫາ, ຜູ້ນັ້ນຈະຖືກປັບໄໝໂຕລະ 100,000 ກີບ ເຮົາສາມາດຊື້ອາຫາມາເກືອໄດ້ມັນຈະມີເຂດເກືອປາຢູ່ໜ້າຖ້ຳ

ກຽມພ້ອມຂີ່ເຮືອລອດຖ້ຳ 7 ກິໂລ

ໃນການເຊົາເຮືອນັ້ນເຂົາຈະໄລ່ປະມານລຳລະ 100,000-130,000 ກີບ ເຊິ່ງຂີ່ໄດ້ປະມານ 3 ຄົນຈະມີເສື້ອຊູຊີບ ແລະ ໂຄມໄຟຕິດຫົວໃຫ້ພ້ອມ

ຈະມີບ່ອນພັກເຮືອກາງຖ້ຳໃຫ້ຍ່າງເບິ່ງຫີນຍ້ອຍ,​ແຕ່ເສຍດາຍມື້ທີ່ໄປນັ່້ນຖືກຕອນໄຟຟ້າດັບ

ເຊີ່ງຕອນຂີ່ເຮືອນັ້ນທາງໄນຂ້ອນຂ້າງມືດ, ບໍ່ຄ່ອຍໄດ້ເຫັນຫຍັງ, ໃຜມີໂຄມໄຟໃຫ່ຍໆ ແຈ້ງໆ ແນະນຳໃຫ້ເອົາໄປນຳ ເພາະຈະໄດ້ເຫັນບັນຍາກາດພາຍໃນຖ້ຳ, ລະອີກອາລົມໜຶ່ງຄືຈັ່ງກຳລັງແຂ່ງເຮືອກັນ, ເພາະທາງໃນຖ້ຳສຽງຈະກ້ອງດັງ ຖ້າໄປຖືກຕອນນ້ຳແຫ້ງ ຈະໄດ້ລົງຍ່າງບາງຊ່ວງໃນຖ້ຳ

ອີກຟາກໜຶ່ງຂອງຖ້ຳ

ໃນທີ່ສຸດກໍ່ອອກມາຮອດອີກຟາກໜຶ່ງ, ການເດີນທາງຂ້າມມາຟາກນີ້ຈະໃຊ້ເວລາປະມານ 40-50 ນາທີຖ້າເລາະເບິ່ງຫີນຍ້ອຍນັ້ນດົນກະຈະໄຊ້ເວລາປະມານ 1 ຊົ່ວໂມງ.

ຈະມີຮ້ານຂາຍເຄື່ອງທີ່ລະນຶກ, ແຜ່ນແພ, ສິ້ນ, ຂາຍນ້ຳ, ຂາຍເຂ້າປຽກ....

ເມືອຂື້ນມາຝັ່ງ, ຈະມີຮ້ານຂອງບັນດາພໍ່ແມ່ພີ່ນ້ອງ ໝູ່ບ້ານຟາກນີ້, ຈະມີຂາຍເຄື່ອງທີ່ລະນຶກ, ແຜ່ນແພ, ສິ້ນ, ຂາຍນ້ຳ, ຂາຍເຂົ້າປຽກ.... ເຊິ່ງເຮົາສາມາດນັ່ງພັກຜ່ອນ, ຊື້ເຄື່ອງທີ່ລະນຶກຕິດໄມ້ຕິດມືກັບບ້ານໄດ້

ແລະ ແລ້ວກະຂີ່ເຮືອກັບບ້ານ

ສະຫຼຸບ:

ສຳລັບຄົນທີ່ຕ້ອງການພັກຜ່ອນແທ້ໆ ແນະນຳໃຫ້ມາທີ່ຖ້ຳກອງລໍ່ໄດ້, ເພາະທຸກຢ່າງຢູ່ທີ່ນີ້ແມ່ນຍັງເປັນທຳມະຊາດຫຼາຍ ບໍ່ຄ່ອຍວຸ້ນວາຍຄືຢູ່ທີ່ອື່ນ, ຄ່ຳມາກິນເຂົ້າລະກະນອນພັກຜ່ອນ, ກຽມພ້ອມລຸຍກິດຈະກຳໃນວັນຕໍ່ໄປ. ຖ້າໃຜຄິດຈະມາແນະນຳໃຫ້ມາຊ່ວງເດືອນ 10 ຫາເດືອນ 2 ຈະເປັນຊ່ວງຍາມໜາວ ບັນຍາກາດຈະຄັກ ແລະ ລະດັບນ້ຳກໍ່ພໍດີ, ແຕ່ຖ້າມາຍາມຝົນຈະໄດ້ເຫັນທົ່ງນາຂຽວທັງສອງຟາກທາງ, ແຕ່ຈະເຂົ້າຖ້ຳບໍ່ໄດ້ເພາະນ້ຳຈະເຕັມປາກຖ້ຳ. ຖ້າມາກາຍເດືອນ 3 ລະດັບນ້ຳຈະໜ້ອຍ ເຮັດໃຫ້ຂີ່ເຮືອລຳບາກ.

ສຸດທ່້າຍນີ້ຂໍຝາກສອງຮູບເພື່ອປຽບທຽບລະຫວ່າງຍາມຝົນ ກັບ ຍາມແລ້ງບັນຍາກາດສອງຟາກທາງ

ຍາມຝົນເຂົ້າຂຽວງາມ

ຍາມແລ້ງ ປະຊາຊົນແຖວນັ້ນຈະປູກຕົ້ນຢາສູບ

ທັງໝົດນີ້ເປັນການລີວິວແບບບ້ານໆ ຂອງຂ້ອຍທີ່ໄດ້ໄປ ອາດຈະບໍ່ແມ່ນນັກລີວິວມືອາຊີບ ຂາດຕົກບົກຜ່ອງປະການໄດຕ້ອງຂໍອະໄພມານະໂອກາດນີ້ດ້ວຍ, ຂໍຂອບໃຈທີ່ອ່ານຈົນຈົບ ໄວ້ໂອກາດໜ້າຈະມາລີວິວສະຖານທີ່ອຶ່ນຕໍ່.

ຂຽນໂດຍ:​ ສອນໄຊ ພົງສະຫວັດ (Oley SPV)